Transcription

Marie duchesse d’Orléans, de Milan et de Valois, contesse de Blois, de Pavye et de Beaumont, dame d’Ast et de Coucy, ayans la garde, gouvernement et administracion de nostre tres chier et tres amé filz Loys duc, conte et seigneur desditz duchiéz, contéz et seigneuries, et de noz autres enffans. Au maistre des boys et forestz de nostre conté de Blois, ou son lieutenant, salut. Comme nous ayons donné et octroyé a notre chier et grant ami Jehan Briconnet conseillier de monseigneur le roy et receveur general de toutes ses finances en faveur de plusieurz personnes, par plaisirs qu’il nous a faiz et espoir que plus fere, le nombre,

quantité et pieces de boys de bout cy dessoubz declarees. C’est assavoir trois traynes de chacune six toises de long, six tirans de six toises de long quarante quatre chevrons de chacun six toises de longueur, cinq poinsons de chacun cinq toises et demye de long, deux seurfaiz ung fest portans huit toises de long chacun, huit sablieres chacune de quatre toises de long, deux longueurs de chacune six toises de long, soixante soliveaulx de deux toises de long l’un portant l’autre, vingt deux grans entraiz de trois toises et vingt deux autres de dix piéz seulement de longueur, quarante quatre esselieus de six piéz de long l’un portant l’autre. Item quarante autres esselieus d’une toise de long chacune, quarante quatre blonchéz pour faire trances sur les sablieres d’une toise de long pour faire lyason et croysees [ ?] seurfaist, quarante toises de boys, dix toises de boys pour fere lyens qui yront sur le seurfaist, quatre solyveaulx de deux toises et demye de long pour lucanes, cent toises autre bois et quarente quatre jambectes de six piéz de long chacune et autre menu boys jusques au nombre et quantité de douze cens soixante toises ou environ, lequel boys cy dessus déclaré, extimé à dix deniers tournois chacune toise l’une portant l’autre. Vous mandons que lui faciez bailler et delivrez au lieu plus prouffitable pour nous et aisié pour ledit Briconnet touteffoiz qu’il vous en requerra en l’usage de noz forestz de Blois ; et par rapport ès presentes de nous signées avec quictance de lui suffisamment d’icellui boys audit receu. Nous voulons icellui boys estre alloué ès comptes dudit maistre et par tout ou il appartiendra par noz amez et feaulx conseillers gens de nos comptes ausquelz nous mandons ainsi se fere sans difficulté. Car ainsi le voulons et nous plaist entre fait. Non obstant quelconque ordonnances, restriccions [ ?] ou deffenses faictes par nous au contraire. Donné en notre chastel de Bloys le XXIe jour de mars

l’an mil CCCC soixante et douze avant Pasques.

Marie

Par ma dame la duchesse, Villebresme

[Au verso : ]  Je Jehan Briconnet conseiller du roy nostre sire et receveur general

de toutes ses finances, confesse avoir eu et receu tout le boys

contenu au blanc de ces presentes lequel m’a esté baillé, delivré

par le maistre des bois et forestz de madame la duchesse

en son autel de Blois, jusques au nombre de douze escus

soixante ... ou environ duquel je suis content

Teimoing mon seing manuel cy mis le VIe jour de

juing l’an mil cccc soixante et treize

Briconnet